-->
random

آخر المواضيع

random
recent
جار التحميل ...
recent

مشهد فى القشاش / الشاعر : عادل عوف - دمياط -

مشهد فى القشاش
............................
لو حد شاور له يقوم يهدى ويقف في الحال
لو شيخ او شاب في ايده واحده ومعاها عيال
او واحد شايل كام شنطه و علي ضهره شوال
ولا عمره إشتكي يوم م الزحمه و دايما شغال
.......................
في العيد بيجمع ناس غابت ويلم الاهل
ودا شئ لو تعرف إيه قيمته و فعلا مش سهل
محتاج مجهود صعب لغيره وخصوصا كهل
شايل ومحمل فوق طاقته وما سألش سؤال
................
مليان حكايات حصلت فجأة غير الأسرار
قشاش طول عمره لكن ماشي بهمه وإصرار
علي جسمه مافيش حته سليمه من غير أضرار
وان صفر تطلع صفرته حشرجه وسعال
...................
تركب جواه تلقي مآسى والخلق ظروف
واحد متجضع وفـ إيده جردل وجروف
والتاني بيأمن علي كرسي وساحب له خروف
رايح للبطرى يشخص له سبب الإسهال
..................
و مشنه بتصرخ من طيبها ذبده علي فطير
وعمامة تقول لك لفتها انا تحتي غفير
وشباب واقفين حوالين واحده ونزلين تضقير
من ضيق جلبيتها وكحلتها وبيقولوا حلال
..................
وبطشت في اخر العربيه واحده بقراميط
وجدع بيلف وعلى راسه غربال فيه صميط
بيشاور له مخيمر فقناوي قاله دا شميط
هيبيع لك واحده وبثمنها يملى الغربال
....................
وموظف سرحان هَـ يكمل الشهر منين
والحمل اهو زاد غصب عنه وبقي صاحب دين
بيبص فـ شاف اتنين جانبه فعلا نايمين
فتمني يكون واحد منهم في هناوة البال
....................
وعيون بتلاغي اللي قصادها من فرط الجوع
وان رد عليه نظره بنظره خلص الموضوع
وساعتها هينزل في ميعاده او في الممنوع
طلع اللي مابينهم كان صادق او حتي شمال
..................
قشاشنا هـيوصل وهـتنزل كل الركاب
ويسيبوا قصصهم بالواحده علي عتب الباب
وهيركب غيرهم ويرحوا لنفس الأسباب
والكل بيوصل كان مجدع او م الأندال
عفويات
عادل______عوف

الكلمات المفتاحية :

التعليقات



إذا أعجبك محتوى مجلة نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد النبراس السريع ليصلك جديد المجلة أولاً بأول ، كما يمكنك إرسال رساله بالضغط على الزر المجاور ...

إتصل بنا

المحررون المتواجدون لآن

أنت زائر مجلة النبراس هذا العام رقم

Logo

Logo

احصائيات

View My Stats

شاركه

جميع الحقوق محفوظة

مجلة النبراس - أدبية ثقافية إلكترونية

2017/2020