-->
random

آخر المواضيع

random
recent
جار التحميل ...
recent

منحة عيد الأضحى... قصيدة عامية للشاعر: حمودة المطيرى

ربما تحتوي الصورة على: ‏‏شخص واحد‏، و‏‏‏سيلفي‏ و‏لقطة قريبة‏‏‏‏

منحــــة عيــــــــد الأضحى المبــــــارك 


قالوا وزيرك جاب لك منحة 
عيد الأضحى قلت يعيش
رحت إدارة قوص وانا بارقص
تقولش ساعتها شربت حشيش
فجأة بابص ورايا لقيت
عسكرى نازل فيا تلطيش
ضربة تسيبنى وضربة تصيبنى
وضربة تخلى العظم دشيش
****
رحت موطى فى ودنه قايل له 
سيبنى يا باشا وخد بقشيش
فجأة لقيته أتغير خالص
تشوفه تقول على طول درويش
قلت غلطت يا سيدنا الشيخ 
أنا مستغنى عن الكلابيش
وأعدك أنى أخيط خشمى
ولا أحتك بأى شاويش
بس عاملنى بأنى صغنن 
ولسه ما خدر فيا الريش
وأنا باتكلم لسه معاه
فجأة أخدنى على التفييش
مالى بابص شمال فى يمين 
شفت خلايق عقل مافيش
دخلت فى وسط الصف أنادى
وزيرى ارحمنى بلقمة عيش
فجأة لقيت الناس بتدوسنى
وأنا تحتيهم زى الخيش
قمت ألملم عظمى الضايع
وابنى فى نفسى من التناتيش
لساك بابنى وابص قصادى
شفت رجال لابسين طرابيش
وشد قفايا واحد منهم
وزحنى بسرعة على التفتيش
دخلت وروحى وكفنى فى يدى
مين بيروح عش الخفافيش
****
طلعت أهلوس دون ما أنا دارى
وزيرى حبيبي كفاية تطنيش
هو عشانك آكل زيك 
لحمة وفتة وجنة قريش
تحرق دمى وتكتم همى 
وتلفق لى قرش حشيش
هو أنا ناقص تانى مصايب 
ده حاجة تخلى العقل يطيش

***************
شعر / حمودة المطيرى
الكلمات المفتاحية :

التعليقات



إذا أعجبك محتوى مجلة نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد النبراس السريع ليصلك جديد المجلة أولاً بأول ، كما يمكنك إرسال رساله بالضغط على الزر المجاور ...

إتصل بنا

المحررون المتواجدون لآن

أنت زائر مجلة النبراس هذا العام رقم

Logo

Logo

احصائيات

View My Stats

شاركه

جميع الحقوق محفوظة

مجلة النبراس - أدبية ثقافية إلكترونية

2017/2020